Duco aad u qiima badan

Videoclipkan waxuu ka koobanyahay Duco aad u qiimo badan oo uu akhrinayo Sheikh  محمد الناعم . Illaahay waxaan ka baryahayaa in uu naga aqbalo, isagana miisaankiisa xasanaadka’ah u saaro.

Abu Huraira (Alle ha ka Raali noqdee) ayaa sheegay, in Rasuulka [Illaahay naxariis iyo nabad galyo korkiisa ha yeelee] uu yidhi:

” Qof kasta oo idin ka mid ah ducadiisa Ilaahay wuu aqbalaa haddii aanu jawaabta deg degsan oo aanu odhan: Anigu Ilaahay baan baryoo ii muu yeelin wixii aan weydiistay.” [Waxa weriyey Bukhaari iyo Muslim]

Akhriso ‘Asluubta Alla-Bariga ama Ducada’ by Kawsar Mahamud

“Jannadu waxa ay hoos imaadaa hooyada”

Waxaa bilowday muctamarkii xagaaga ee magaalada Oslo, Norway. Kaas oo bilowday khamiistii 9.april.2009 oo soo afjarmaya maanta oo ah Axad 12.April. 2009. Ciwaanka mutamarkani aad ayuu u xiiso badanyahay sidaan u arko.

Fursad uma helin muctamarka in aan ka qayb qaato, laakiin waxaan kala socdey Paltalkiga markaan wakhti u helo. Illaa iyo hada waxaan dhageystay maxaadarada la magac baxday “Jannadu waxa ay hoos imaadaa hooyada” ee uu soo jeedinayay sheekh Maxamed Idris.

Maxaadaradan runtii waxey ahayd mid aad u qiiro badan, isaga oo uu sheekhu markuu ka sheekeynayay qiimaha hooyada ilmadu ka daadaneysay.

Hooyo Soomaaliyeed from ednahospital.org

Hooyadayna oo ila dhageysaneysay maxaadaradan waxa ay xasuusatay hooyadeed oo dhimatay qiyaastii 15 sanno kahor. Waxa ayna la ooyeysay, hooyadeed in eysan u baarinimo sameyn jirin. Arintaasna anaa markhaati ka ah, oo hooyaday baarinimo tii ugu wanaagsaneyd ayey hooyadeed u sameyn jirtay, jeer ay ayeeyday diiday in ey dagto meel aan ka aheyn hooyadey agteeda. Hooyadeyna intey yareyd ilaa ay ka guursatey iyo ilaa intey ayeyday ka dhimaneysay, isku si ayey ugu baarinimo sameyn jirtay. Waxaa jirta bari in ey ayeyday oo joogta baadiyaha gobolka Qoraxey ee dalka Ogadeniya ay bukootay. Markaas iyada’ah, hooyadey waxa ay daganeyd Hiiraan, dalka Soomaaliya. Hooyadey waxa ay markaas laheyd 3 ilmood, oo aan aniga oo jira wax aan sannad dhaneyn ugu yaraa. Markuu warkaas isaga ah (in hooyadeed bukootay) maqashay, ayeey aad u murugootay. Walaaladeedii kalana ma aysan maqal arintan. Hoyaday iyada oo cidlo dareemeysa ayeey tirisay buraanbur, kaas oo ay ugu calaacaleyso walaasheed ka weyn.(Buraanburku wuxuu ahaa mar kasta, habka ey hooyadey murugadeeda ku cabirto.) Waxayna tidhi:

“Shimbirta qeyleysa ee qaaradaha martay, in aan Qoraxay tagoo qaabna aanan hayn, oo hooyadeen qaadi karin, qaayo Khadar (habaryartay) usheeg”

“Ergadii Furqaan”

Faalayn: W.Q: Batulo Abdirahman

Gabay ( 5-tiiba 5)

Gabaygan “Ergadii Furqaan” waxaa tiriyay abwaanka Maxamed Ibraahim Warsame (Hadraawi) wuxuuna ku jiraa buugiisa “Hal Ka Haleel”. Waa gabay aad cajiib u ah. Wuxuu kamid yahay gabayada Soomaaliyeed ee aan aadka u qadariyo, kuna ihtimaamo in aan dabo iyo dacal xifdiyo, walowba uu xifdiskeyga gabayada aad u xunyahay. Sababta aan gabaygan ku jeclaaday ma’aha kali’ah ixtiraamka aan u qabo abwaanka Hadraawi, ee waa xataa jacelyka aan u qabo Nabi Muxamed [scw]. Gabaygan wuxuu ka sheekeynayaa dhalashadii Suubanaha [scw] ilaa iyo geeridiisii.

Nebiggi Ilaahow
Nuurkii Islaamkow
adigoo adduunkiyo
ifka weli ka maqan baa
lagu sii oddorosoo
ishaarooyin badan baa
dadku kaa arkeenoo

Maalmaha Illaahay
qaar baa astaanlee
toddobada ayaamood
Isniin baad ka dhalatoo
adduunyada xuskaagii
ololaa ka dhacayoo
urur-weyne goortii
ugxantaadu bururtaa
xiddiguhu ifeenoo
dayaxaa ilayskii
arladoo dhan gaadhoo
onkodkiyo hillaacaa
araggiyo wax maqalkii
ash qaraar ku ridayoo
Insigiyo jinkaa farax

Abshir dhaha la yidhiyoo
inta haadda duushiyo
idil ha bar dugaag baa
abaabuley ciyaaroo
dhirtu oogadaadiyo
afartaada geesood
ubax iyo caleen bay
ku ilaa-xidheenoo.
Abtirsiimadaadiyo
meeshaad ku ababtaa
dadku wada ogaayoo
Aaminatu Wahab baa
kugu qaaday uurkoo
weli soo if bixin baa
adoogaa xijaabtoo
nafta laga aroorshoo
Amran hooyadaa baa
ummushii ku dhimatoo

Sii akhri….

Igu qaad gacmahaaga (Sheeko ) [1]

W. Turjumtay: Batulo Abdirahman

Markaan imaaday guriga habeenkaas isaga ah, ayey xaaskeygii iikeentay casho kadibna gacantaan ku dhagay oo aan ku idhi :” wax baan rabaa in aan kuu sheego!’’ Way fadhiisatay iyada oo qunyar cunteyneysa. Markale ayaan fiiriyay oo waxaan arkay dhibaatada indhaheeda ka muuqata.
Waxaan garanwaayay sida aan ugu sheego. Laakiin waan ku qasbanaa in aan usheego waxaan ku fakarayo. Waxaan rabaa furitaan! Waxaan usoo bandhigay mowduucii si aayar ah. Ma aysan u ekeyn mid ay erayadeydu ka cadheysiiyeen ee waxay si dabacsan iiweydiisay sababta? Waan iska dhaga tiray su’aasheedii. Kadib way xanaaqday wayna igu qeyliday oo ay igu tidhi :” ma aad tihid nin!’’
Habeenkaas isaga ah islama aanaan hadlin oo wey ooyeysay. Waan garanayay in ay rabto in ay ogaato waxa ku dhacay guurkanaga, laakiin ma aanan siin karin jawaab qancineysa. Qalbigeygii waxaa qaadatay gabadh macaan oo la dhaho Dew. Markaas jaceyl umahayo xaaskeyga dibdambe. Waan ka naxay !
Aniga oo dareemaya mid aad dambiile u ah ayaan ugu yeedhay in ay ila gasho heshiis furitaan, kaas oo aan siiyay guriganaga iyo iney ila wadaagto 30% oo kamid ah shirkadeyda iyo gaadhigeyga. Way dhowrtay warqadii kadibna way jeex-jeexday. Qoftii ila wadaagtay toban sanno oo nolosheeda kamid ah ayaa ila noqotay ‘ajaanib’. Waan ka xumaaday wakhtiga, tabaca iyo awoodaan ka khasaariyay, laakiin ma aanan ceshan karin waxaan idhi, sababtoo ah aad baan ujeclahay Dew…….

Akhri isagoo dhamaystiran

__________________________________________________

[1] Qisadan oo asalkeeda lagu magacaabo” Carry me in your arms” ayaa waxaan ka soo xigtay daabacaada Koonfur- Afrikaanka ah ee la dhaho Al- islaah publications ama homepage-kooda everymuslim.net. Qoraaga qisadan lama yaqaano!